Plu Glosa Nota

Munda komunika e loka dice

Pro internatio merka e vendo na nece puta; ne solo de boni translati de u textu; sed plus de plu loka dice.

Nu na habe tako komunika trans holo munda; id es ma facili de merka e vendo inter singu landa. Anti-co, na ne debi doxo; singu natio dice e akti iso alelo te forma mo munda kultura. Kontra-co, poli-pe fo alexi mu matri lingua e mu bio-mode; te tena mu histori e mu idio mode. Poli stato in pre Soviet Unio nu uti mu matri lingua e dialekti te monstra mu neo libe pote. E klu in Europa, interese de plu mei ge-uti lingua du kresce. Nu Katalan es u proto lingua de oligo miliona civi.

Id es gravi de komunika klari e efekti trans u-ci mixa de komercia merkato; iso tem minus mis-duce alo ofende ali-pe. Sura, un uti de un Inter-reti nu dona u plus dimensio ad u-ci ad internatio merka e vendo komunika. Pe nece akti fo kura de translati e uti plu designi, bileta e plu lexi de plu merka-ma e vendo-ma. Translati posi es mega preci; sed plu-la ero-translati pote es klu ma preci! U translati-pe nece habe u boni ski de un ur-textu; e plus-co, habe u boni ski de plu civi, de plu bio-mode e loka-dice in plu-la landa topo singu vendo-ma fu gene uti. Singu translati-pe nece es sensitivi de e ski de plu nu mode e plu acide de u-la landa. Mu ne pote risko lose developo de plu in-frasi, plu idioma e plu acide. Exempla: plu lexi de surfing, gay e net in England lingua nu habe plu hetero elekti de semane de pre oligo anua retro.

Plu translati programa de plu puta-me nu du progresi fo tako; e in poli okasio id es gru de translati facili textu; exempla; plu-la de singu-di komercia grama. Kon auxi de u fo tekno translati-pe plu translati puta-me programa sti ma tako mu ergo. Sed kon no-tekno translati-pe; u textu pote tena poli ero. Id es gravi de dura lekto dia e verifi plu lexi-lista e frasi-lista.

Pe nece decide u maxi boni mode de transfero u textu ex auto puta-me ad Inter-reti pagina eko-lo. Exemple: Qe plu leko-pe de id fu lekto u textu ex laevo a dextro alo ex dextro a laevo? Qe plu Englanda lekto-pe fu reakti hetero ad ‘ #’ signifi de plu USA lekto-pe? Si plu translati-pe e designi-pe ergo kon alelo ex proto; u fini textu e designi de mu inter-reti pagina fu dona gluko, facili de lekto e efekti info.

Suma-co, ali translati-pe debi memo plu lexi de u Francais grafo-pe Antoine de Saint-Exupery. An pa dice: ‘Lingua es u fonta de panto mis-logi.’ Na buta: es de sto u-ci mis-logi, per boni translati ad in Glosa.

Glosa Filma Qo Akti?

U-ci anua tri Glosa-pe pa akti mero in un arti-projekti ex Sa. Mathilde ter Heijne; fe es un arti-fe ex Nederland. U-ci projekti pa gene nima ‘Qo akti?’ Id es

u video filma ge-difusi per sixa monito-me; u tema es de u filosofi de Sa. Simone Weil. U textu de u-ci brevi filma es ge-dice in Glosa; e id proto monstra pa acide in Galeri Martina Detterer,in Frankfurt-am-Main, Deutsch-land tem Juni e Juli 2003.

Un ur-texu de ‘Qo akti?’ veni ex filma; de un Italia direktora Liliana Cavani; sed a-nu u-ci filma ne pa gene reali. Wendy Ashby pa translati mero ur-textu ex ‘Lettere dall’ Interno (ge-grafo in Italiano ex Liliana Cavani kon Italo Moscati tem 1971) ad in Glosa.

U drama-textu de u-ci pusi ge-ski filma es u tristi drama; mero id es de fe biografo; e mero de fe histori karakteri. Id es de u bio de u francais filosofi-fe Simone Weil (1909-1943). Id monstra fe lukta te sti libe plu ergo-pe; e te dona eqa okasio a panto-pe. Fe plu puta de morta, de sufere e de salva dona plu pikto de plu seqe acide de histori. Mu inklude fe ergo in face-do in France tem proto de plu 1930; e ex Hispania Intra-Milita ad u-la kron fe pa lose bio in England tem 1943. Fe pa lose bio kausa minus de sito e de mega debili; fe pa habe solo 34 anua.

U drama-loka de u filma es u pa-Nazi milita-do in Krampnitz proxi Berlin. U Rosija arme pa eko la pre Deutschland re-unio. Nu-di pe uti u-ci loka pro face poli filma.

Kausa de fe tende; de sti libe plu ergo-pe e ofere panto-pe ma okasio; Simone Weil es u fo gru persona pro proto filma in Glosa.

Plu gina-voci pa gene dice ex Sa. Wendy Ashby e Sa. Sabine Asenkerschbaumer; e andro-voci ex Sr. Rainer Asenkerschbaumer.

- pagina 2: -

Liliana Cavani – grafo-pe

Liliana Cavani pa es mo de plu maxi duce filma-face-fe in Italia pre 1978. Fe rejekti de honesti e direkti femina plu idea pa stimula kritici, apologi e koleri ex oligo femina-pe.

Kon u filma ‘u Notku Fero-pe’ (1974) Cavani gene mega interese ex Amerika.

Fe pa proto face plu filma pro televisio; mu es de Mussolini, Hitler, e mo de plu milita-fe; qi pa akti mero de grega resista-dina. Fe duce interese pa es de ‘boni’ e ‘kako’, e komo bi-ci akti tem milita-tem. Per fe investiga jurnalisti ergo de plu idio experie de plu ge-noku-pe po milita; fe pa gene inspira de face ‘u Noktu Fero-pe’.

Simone Weil – fe-hero de u filma

Simone Weil pa gene nati in Paris tem 1909; e pa gene eduka in Ecole Normal Superieure, fe pa es mo de plu proto gina stude-pe la. Fe pa esce u doci-fe; sed plus-co, pa ergo in plu agri-lo e plu face-do; topo fe pa elekti de akti plu no-facili manu ergo te experie u bio de u norma ergo-pe. Tem 1936 fe pa es u membra de u Republika dina in Hispania Intra-Milita; fe pa ki versi ab ante-line po sufere u mali piro-noku in mal-acide. Tem 1942 fe pa ki ab ex France e pa es membra de Libe plu France-pe in London. U fu-anua fe pa lose bio ex tuberkulosis; fe ne pa sio vora ma sito de plu-la persona qi pa sufere ex Nazi okupatio in fe matri landa.

Fe plu grafo monstra; plu-la religio puta e idea qi pa veni ex poli speci fonta – Kristi, Semiti, India, Greko e Hindu – e foku a sufere e salva. U lekto-pe veni facia a facia ko homi konditio e ultra id.

Qo akti?  nova-papira kritici

Christoph Schutte pa grafo u kritici de ‘Qo akti?’ in Deutschlanda nova-papira ‘Frankfurter Allgemeine

Zeitung’ tem Juni 2003. Ci es mero u-la textu ge-translati ad in Glosa.

Qo akti?

Ergo ex Mathilde ter Heijne in Galerie Martina Detterer.

U lamina de sika pani; mero po mero, morda po morda. U vora-tem. Semi pani dura kumbe proxi u vaku disko; sed fe ne fu toka id.

Alo: u fo soni makina in fronta-vista; e supra u-ci fo voci: ‘Si ex nu; tu akti okto-centi; posi mi fu lase tu du ergo ci.’

Alo: U gina gene fusili; id es milita.

Sixa sti puta seqe simi-co, es sati pro u Nederlanda arti-fe Mathilde ter Heijne; te dona u brevi-vista de u France filosofi-fe Simone Weil; qi pa lose bio in England de famina e debili. Fe ne pa sio vora ma de plu-la hetero-pe de fe landa; qi pa sufere de dina ex Deutschland; e fe pa es aktivi in Hispania Intra-Milita………

U no-ge reali drama-textu pa gene translati ad in solo 1000 lexi; u funda un internatio auxi lingua ‘Glosa’; qi habe u tende; te libe de disputa e dona ma boni logi inter panto homi………

Plu gentili kroma-space lumi; tem mo skuta sto; un soni de plu frasi reflekti in kefa de u vide-pe; seqe-co plu impresi dura la. Ka, minus falsi-monstra un hero-fe ‘Qo akti?’ gene laxi; proxi no-ge-vide ab solidi fatu e qestio de konstitu de societa; e sti relatio inter teori e praxi e analisi fe auto punktu de vista. Plu tortu qestio de Simone Weil; mu es plu qestio de na.

Plu qestio e reakti

Qestio:

Qe Glosa es u libe alo ge-kontrola lingua? Oligo pe per Inter-reti feno grafo mu auto speci Glosa.

U struktura de u Glosa lingua es uniformi. E pe uti plu-la internatio simboli qi es uniformi. Qe singu Glosa-pe fu esce uniformi? Qe plu Glosa-pe fu uti solo mo speci etiko e mo speci humoro? Qe posi singu Glosa-pe fu akti e dice exakti iso alelo?

Mathilde ter Heijne

Berlin, Deutschland

Reakti:

Ali lingua nece habe plu regula; e sura, Glosa plus-co, habe mu. Plu Mekani de Glosa e u Glosa 1000 lexi-lista es fo gravi ad universa Centra Vokabulari. Maxi numera lexi de u-ci Centra lista es brevi; tako de memo e grafo; e mu es facili pro plu civi de panto landa de dice. Na panto-kron emfasi u gravi de u-ci brevi e eficie Centra Vokabulari; qi dura es u Kardia de Glosa.

Po-co, es u ma-mega lexi-lista; qi ofere poli simonima; plura mu habe ma longi lexi; qi es fo ge-amo ko plu-la persona; qi amusa se de grafo poesi, literature e plu komplexi lexi-enigma. Pe es libe de uti idio grafo-mode;

- pagina 3: -

e tem ma civi ex poli landa uti Glosa; id fu dura de develop e kresce id idio mode. Si pe grafo fo gravi info; e mu volu panto-pe de klari logi id; id es gravi de boni uti plu mekani; e de uti plu brevi e facili frasi.

De un uniformi Glosa-pe

Sura, no. U seqe sio es u no-stimula bio.

In PGN ex kron a kron pe lekto poli speci artikla de plu-la sistema qi es nu internatio ge-ski; poli mu es per pikto; exempla; plu internatio simboli homo na vide in plu aeroporta e navi-lo de panto landa; e plu simboli de skience e teknologi, etc. Na pa publika plu piktografo de oligo tema inklude; fotografi, geografi, e meteologi. Un hetero internatio sistema es u grafo de musika. Ali internatio sistema qi es uniformi; pote gene uti para Glosa te auxi internatio komunika.

Iso tu pa lekto in artikla ‘Munda komunika e loka dice’ de u-ci PGN; plu civi de singu natio ne akti alo dice iso alelo; e na ne habe solo mono kultura trans holo munda. Humoro es fo komplexi; e freqe ne translati fo boni ex mo lingua ad hetero; veri, uno-pe de mo urba ne sio ridi po audi komika stori ge-dice ex an vicina-pe. Id sio es u boni tekno si u grafo-pe pote grafo u stori; qi panto-pe ex panto-landa sio detekti amusa.

De u Glosa uniformi etika trans holo munda. Qo speci akti etika? Qe na debi grafo u sistema de internatio akti pro plu merka-pe e vendo-pe? Qe pe debi uti plu-ci akti para alo vice plu etika de u certa landa? Qe ali lekto-pe habe plu idea de u-ci tema? Si ja, place grafo a PGN.

Id es gravi pe habe plu indika qi es internatio e klari kon alelo; sed posi na tro mega uti Glosa de vice plu-ci akti. Glosa es un internatio auxi lingua; na pote facili translati info de panto-ra inklude de plu etika de singu landa ad in Glosa; e po-co, difusi u-ci info a panto-pe. Glosa es pro internatio komunika e eduka; ne pro sti dina internatio regula e kontrola. Na nu bio in fo multi kultura munda; qi tena un interese mixa de plu idea, more, arti, religio, histori, musika, etc.; qi dona a na u munda de poli speci-ra de dura tena na amusa e stimula. Glosa du akti id mero in u-ci komplexi e sti-mira munda.

Qestio:

Mi pre-nu grafo oligo grama e qestio de Glosa a tu. Tu pa fo auxi mi, mega gratia! Mi fo amo un idio e elementa Glosa. Seqe-co, mi re-grafo; te gene ma de u-ci interese internatio lingua.

De plu vice-verba; in Englanda-lingua na habe s/he alo his/her. Komo pe sio translati u frase homo:

a doctor and his/her friends?

Plus-co mi volu qestio de ‘Tako Glosa’ sistema. Qo-pe pa krea id? E qo-tem? Komo pe pote gene ski de u-ci?

Gareth Clee,

Cardiff, Cymru

Reakti:

Karo Gareth,

Ave! Fo gluko audi itera ex tu; e hedo de ski; tu dura fo amo Glosa.

S/he es fe/an.

U frase: a doctor and his/her friends. In Glosa es: u medika-pe e an/fe plu ami.

Plu Glosa lexi ‘an’ e ‘fe’ es fo brevi; seqe-co, id ne habe mega valu de tenta klu ma brevi mu.

Pre poli anua Ron Clark e Profesora Lancelot Hogben pa dice de un idea de Tako Glosa (TG) oligo kron. Plu komunika pa es per telefona kla e plu grama; iso tem mu pa kambio info e plu idea de oligo hetero aspekti de Glosa. U-ci pa proto acide cirka 1968/9. Hogben pa lose bio tem 1975.

Ron pa dura este fo interese de TG; sed ne pa ma developo id ad u-la tem. Poli anua ma tardi an re-proto grafo id; e an pa publika un artikla de id in PGN numera 24 tem 1986. Plu hetero artikla de TG. pa gene publika in PGN 25, 26, 27, e 47. Ron pa tende grafo u bibli de id; id ne pa gene reali; u-ci ne pa es de an lose de interese; sed kausa de an pa es fo aktivi ko grafo plu hetero Glosa lexi-bibli e PGN; e inter-tem na pa du es aktivi ko difusi Glosa e organisa plu Glosa unio in London e Richmond.

Tem 1995 oligo Glosa-pe petitio ma info de TG. Ron re-tenta developo un idea; an pa verifi an ur-lista; po-co, an pa inklude info de TG. in PGN 64 e 73. Nu mi ne habe panto TG. papira ko mi; veri mi ne pa skope mu ex pre morta de Ron. Ex u-la kron mu es in sekuri stora-lo ko poli hetero Glosa-ma. Fu-meno un ami de mi fu fixa u plika-skala a stego-ka de mi domi; plus, an fu aku oligo ligni-taba epi id pedi-lo. Seqe-co, mi fu pote gene e stora panto Glosa-ma e plu bibli de mi. Id fu es interese e amusa apri plu teka e vide plu-la kosa; mi ne pa vide; ex pre tri anua retro. E ma gravi mi fu pote facili uti mu kron mi volu. Sed, mi nu-pa muta e tema! Mi nu veni versi a TG.

Tako Glosa es u sistema de plu ge-brevi lexi; idio ge-face pro Glosa lingua. Pe pote uti id per grafo-ru alo per ali grafo-me alo puta-me klavi-taba; qi habe plu Romani litera. Id es boni pro tako grafo, e ekonomi ko papira e tem. U sistema uti u mixa de pusi e mega litera te vice plu brevi e ma komuni lexi de Glosa 1000. Plu hetero lexi gene forma per uti solo bi, tri alo tetra litera.

Exempla: a = a,ad. A = akti, aktivi singu = sng. Id plus uti plu hetero klavi ex Romani klavi-taba. Exempla: plus = + exklamo = ! qe? = ? astro = * ma de = > e mei de = < e valuta = £.

Mi fu cerka ma info de TG e inklude oligo artikla de id in plu fu PGN. Inter-tem; mi nu-pa detekti paleo fotografi de ma-juve Ron in nova papira. Posi id fu amusa e interese tu. Id pa gene publika tem 1976 in “Western Daily Press”; mu pa dona u papira u Glosa titula. Tu fu vide; id pa es pre fonetika Glosa.

Sr. Ron Clark ko an Glosa “Western Daily Press”

- pagina 4: -

Un Hedo Andro

Brevi stori ex W. Somerset Maugham

Id habe risko de sistema u bio de plu hetero-pe. E mi freqe pa qestio se; de un auto fide de plu-la politika-pe, plu re-forma-pe e plu simi civi qi dina mu ami de muta mu habitu e punktu de vista. Mi panto kron hesita de dona konsili; ka qo-mode pote pe dona konsili ad hetero-pe minus ski u-la persona iso boni de tu ski auto? Boni Ciela! Mi ski fo pusi de mi auto; e mi ski zero-ra de ali hetero-pe. Na pote solo divina de plu puta e plu emotio de na plu vicini-pe. Singu mo de na es u ge-kapti-pe in solito turi; qi komunika ko plu hetero ge-kapti-pe; qi forma homini per plu norma signi; e qi ne habe exakti iso semane pro mu de pro an auto. E mali-fortuna, pe habe solo mo bio; pe freqe ne pote repara plu ero. E mi es qo-pe? Qi debi dice ad ali-hetero-pe qo-mode an debi duce an bio? Bio es no-facili; e mi pa detekti id sati no-facili de boni eko auto bio; e mi ne este ge-stimula de doci bio-mode ad ali hetero-pe. Sed es plu-la andro qi akti ero a proto de mu viagia de bio. U via avanti mu es ge-konfusi e risko; e oligo-kron minus volu; mi pa du gene dina de indika mu fata. Plu-kron plu andro pa dice a mi; mi debi akti qo de mi bio? E brevi tem po-co, mi pa vide se ge-tegu per u-la melano extra-vesti de destina.

Mo kron mi ski; mi pa dona boni konsili.

Mi pa es u juve andro; e mi pa eko in u meso-gluko kamera-fa in London proxi Viktoria Statio. Tardi mo po-meso-di mi nu pa puta; mi pa ergo sati pro u-la di; kron mi pa audi u soni de mi kampani. Mi pa apri u porta; e pa vide un andro mi ne ski. An pa qestio mi nima; mi pa dice id ad an. An pa qestio si an lice veni in.

‘Sura.’ Mi pa reakti.

Mi pa duce an in mi sedi-ka; e pa ofere an u sedi-mo. An pa feno subo embarasa. Mi pa ofere ad an u cigareta; e an pa habe no-facili de piro id minus lase kade an kefa-ve. Po an pa sucede u-ci lukta; mi pa qestio an; si mi pote loka an kefa-ve epi sedi-mo pro an. An tako pa akti u-ci; e iso kron pa lase kade an pluvi-skuta.

‘Mi spe; tu ne este anti mi veni a tu,’ an pa dice. ‘Mi nima es Sr. Stephens e mi es medika-an. Mi doxo; tu es ge-nexu ko medika ergo, qe?’

‘Ja, sed mi ne es u praxi medika-an.’

‘No, mi ski u-la. Mi nu-pa lekto u bibli ge-grafo ex tu de Espania; e mi volu qestio tu de id.’

‘Id ne es u fo boni bibli; mali-fortuna.’

‘U faktu es; tu ski uno-ra de Espania; e mi ski zero hetero-pe qi ski u-ci. E mi pa doxo; posi tu sio dona a mi mero info.’

‘Sura, mi hedo fu auxi tu.’

An ne pa dice u pusi tem. An pa tensio e prende an kefa-ve; po-co, pa tena id in mo manu e feno minus puta de ali-ra pa karesa id kon hetero manu. Mi pa divina; u-ci akti pa dona fide ad an.

‘Mi spe; tu ne doxo id fo strano; de uno-pe tu ne ski dice ko tu per-co.’ An pa ridi; feno subo penite. ‘Mi ne tende dice a tu holo stori de mi bio.’

Kron ali-pe dice u-ci a mi; mi panto-kron ski; u-la es exakti qod mu tende akti. Mi ne este anti id. Veri, mi subo amo id.

‘Bi paleo tanta pa kura de mi. Mi zero kron pa ki ad ali-lo. Mi zero-kron pa akti ali-ra. Mi pa gene game sixa anua retro. Mi habe zero infanti. Mi es medika oficio-an in pato-do in Kamberwell, London. Nu mi ne pote tolera id.’

Il pa es uno-ra fo sti puta de plu-ci brevi e akuto frasi. Mu pa tena dina. A nu mi pa du brevi oku an; sed nu mi ma kura skope ad ad. An pa es u pusi andro; dina e kompakti; ko bari e rondo soma. Posi, an pa habe tri-ze anua; an pa habe u rondo e rubi facia; ex qi bi pusi obskuri e brilo oku pa radia. An melano kapila pa es fo brevi ge-seka ad an buleta-morfa kefa. An pa es ge-vesti per fo ge-uti ciano vesti-fa. Id pa es tro mega supra plu genu; e plu marsu pa es tro ge-ple e no-sistema.

‘Tu ski de un ergo de u medika oficio-an in pato-do. Mo di es fo simi singu di. E posi mi fu akti u-ci ergo tem holo mi bio. Qe tu doxo; id es profito?’

‘Id es profito te gene in-valuta te eko’. Mi pa reakti.

‘Ja, mi ski. Un in-valuta es subo boni.’

‘Mi ne ski; u kausa tu pa veni a mi.’

‘Bene, mi pa volu ski; qe tu doxo; il es ali fortuna pro un Englanda medika-an in Espania?’

‘Qo-ka Espania?’

‘Mi ne ski; mi habe u volu pro id.’

‘Id ne es simi Karmen, tu ski.’

‘Sed id habe heli, boni vini e kromo; e id habe puri aero te boni inspira. Las mi dice; fo brevi e klari. Per fortuna, mi pa gene ski; es zero Englanda medika-pe in urba de Seville. Qe tu doxo; mi sio pote gene sati in-valuta la? Qe id es no-sofi de linqe mi sekuri ergo; e vice id per no-sura ergo?’

‘Tu gina doxo qo de id?’

‘Fe es hedo de tenta id.’

‘Id es u mega risko.’

‘Mi ski u-la. Sed si tu dice, ki la; mi fu akti-co; si tu dice resta ci; mi fu resta ci.’

An pa du skope a mi forti, per plu-la brilo oku; e mi ski; an pa dice u veri. Mi pa puta brevi tem.

‘U-ci fu efekti tu holo futura; tu auto nece decide. Sed mi fu dice u-ci a tu; si tu ne volu valuta e vice-co, tu es hedo de gene solo sati in-valuta te nutri-se e vesti-se, tu debi ki. Ka, tu fu fru u splendi bio.’

An pa ki ab. Mi pa puta de an tem mo alo bi di; e po-co, pa oblivio de an. U-ci acide pa apo ex mi memo.

Post poli anua; minimu mo-penta anua, per fortuna mi pa es in Seville. Mi pa sufere pusi pato problema; e seqe-co, mi pa qestio un hoteli fero-pe si il es un Englanda medika-pe in u-la urba. An pa dice ja; e pa dona a mi un eko-lo. Mi pa ki per vagona; e tem na pa sto extra u domi u pusi e obesi andro pa ki ex. An pa hesita u brevi tem kron an pa vide mi.

‘Qe, tu pa veni te vide mi?’ an pa dice. ‘Mi es un Englanda medika-pe.’

Mi pa dice ad an de mi problema; e an pa petitio mi de veni in an domi. An pa eko in norma domi de Espania; kon u ge-pave-lo. An konsili-ka qi pa duce ex

- pagina 5: -

id; pa es ge-spora per poli bibli, papira plu medika-me e poli hetero-ra. U-ci vista posi sio sti fobo u timidi pato-pe. Post mi visita mi pa qestio u preci de an servi. An pa dice no per an kefa e pa sub-ridi.

‘Es zero servi-preci.’

‘Qo-ka no?’

‘Qe tu ne memo mi? Ka, mi es ci kausa de uno-ra tu pa dice a mi. Tu pa muta mi holo bio. Mi es Sr. Stephens.’

U-ci info signifi zero-ra a mi. An pa sti memo mi de na pa unio; e an pa dice a mi qod mi pa dice ad an. E gradu per gradu; ex funda de mi memo; mi pa memo mero de na pa unio .

‘Mi pa qestio se; si mi ali kron sio re-vide tu, an pa dice. ‘Mi pa qestio se si ali kron mi sio habe u fortuna de dice gratia a tu.’

‘Id pa es u sucede, qe?’

Mi pa skope ad an. Nu an pa es fo obesi e habe zero kapila; sed an plu oku skintili kon hedo e an sani rubi facia fero u fo boni humori. Plu vesti de an pa es fo no-puri; sura mu pa es ge-face per Espanol sue-pe. An kefa-ve pa es u lati-margina Espanol sombrero. An pa feno a mi qasi; an sio ski u fo boni botilia de vini kron an pa vide mo. An pa habe u feno de disipa e plus de holo simpati. Pe posi, sio hesita de laso an apo mu apendici; anti-co, mi ne pote imagina u ma delekto-an te ko bibe u vitri de vini.

‘Sura tu pa es ge-game?’ mi pa dice.

‘Ja, mi gina ne pa amo Espania; fe pa ki versi ad England; fe ma-amo id la.’

‘O, mi este penite de u-la.’

An plu melano oku pa brilo un amusa e milita sub-ridi. Veri, an pa habe u feno de u juve Silenus.

‘Bio es ple de plu re-paga;’ an pa murmuro.

An nu-pa fini dice plu-ci lexi kron un Espanol gina pa veni a porta. Fe ne pa es fo juve; anti-co, fe klari dura habe un hedo e delekta kali. Fe pa dice ad an per Espanol; e mi ne pa pote fali de ski; fe pa es u domina-pe de u-ci domi.

Tem an pa sta para porta te lase mi ki ex; an pa dice a mi. ‘Tem na pa unio tu pa dice a mi; si mi veni a ci, mi sio gene solo sati in-valuta te nutri se e te vesti se, sed mi sio fru u splendid bio.

Bene, mi volu dice a tu; tu pa dice u veri. Mi pa du es pove; e mi panto-kron fu du pove; sed, boni ciela! Mi fo mega pa fru se. Mi ne sio kambio u-ci splendi bio de mi kon u-la bio de ali regi-pe in holo munda.’

Supra plu nefo

(28 nordi 16 uest)

Infra…. plu nefo tenu, ge-difusi, rako-margina, leuko.

Infra inter-nefo .…urba ge-difusi, rako-margina, leuko, rosa, kloro.

Horizo…. leuko, polio, rako-margina nefo dura.

Pusi-supra dista …. polio, akuto, klari plu monti-akro.

Infra mu dista .… no vista

Gran Kanaria.

Cirka .… plu pinus dendro

Dia plu aku …. plu nefo .… epi plu aku .... plu guta.

Supra …. Alti-koni ab-koni …. plu gentili, sedati klina

Solo nudi, aridi.

Na sta epi plu cinera.

Ex …. piro, explode, erupti, vulkani, fumi, fo termo,

Liqi-petro de longi tem pa.

Na sta a pedi de El Teide.

Ex Sr. Sid Pidd

Scarborough, England

O Kapitana! Mi Kapitana!

Ex Walt Whitman

(Walt Whitman pa uti u ‘libe poesi’, qi ne habe forti rima. An pa grafo u-ci poesi po cide de presidenti Abraham Lincoln.)

O kapitana! Mi kapitana!

Na fobo viagia nu-pa es ge-fini.

U navi pa dura dia panto turba.

U premi; na pa cerka, pa gene gania.

Un asilu-lo nu es proxi.

Mi audi plu kampani.

Panto homi voci lauda.

Tem mu oku du seqe u rekti forma

de minus-este e minus-fobo navi.

Anti-co – o kardia! Kardia! Kardia!

O plu kade guta de hema;

Topo epi plano mi kapitana du kumbe –

Ge-kade e frigi e morta.

O kapitana! Mi kapitana!

Sti surge e audi plu kampani,

Sti surge! Pro tu un insigni pa gene leva.

Pro tu u trompeta gene soni.

Pro tu es plu flori-fa e plu orna-zo ko kali banda.

Pro tu plu litora gene u poli-pe.

Pro tu mu voci—un osci kumu ko zelo facia;

Qi tropi a na.

Ci, kapitana! Karo patri!

Es u braki infra tu kefa!

Qe id es u sonia; epi plano

Tu pa kade — frigi e morta?

Mi kapitana ne reakti.

An labia es palidi e no-soni.

Mi patri ne este mi braki.

An habe ni dina ni volu.

U navi pa gene no-moti kon asilu e kon holo.

Id viagia es ge-fini e sucede.

Ab fobo viagia u vikto navi nu veni ko ge-gania uta.

Sti lauda, o litora vi! E sti soni, o kampani vi!

Anti-co, mi ko tristi pedi

Du gresi epi plano; topo mi kapitana du kumbe –

Ge-kade e frigi e morta.

Translati ex Sr.Gary Miller, USA.

- pagina 6: -

Plu Kondimenta

Na uti plu kondimenta te dona ma boni gusta a na sito; e te sto id dekomposi fo tako. Id es fo gluko tem gresi in domi; na este un aroma de mixa de kondimenta flu ex termo kuko-ka. Oligo kondimenta sti memo na de u certa tem de un anua; exempla Kristo-nati alo Paska. E oligo na plus-co, habe plu kandela in domi; ko mixa de plu aroma oleo; te sti dona a na u simi efekti.

Plu kondimenta gusta e fragra fo boni; sed plus-co, mu habe plu terapi profito. Ci es oligo kondimenta ko mu Glosa e Englanda-lingua nima; e brevi nota komo mu fu sti ma boni tu sani e kuko.

Cinamom (Eng. Cinnamon) U-ci kondimenta gene face ex ge-sika intra-mero de kortika; id veni ex dendro de u genus Cinnamomum. U-ci dendro es membra de iso famili de Laurus.

Cinamom es boni terapi te sti mei plu simptoma de u koriza. Loka u baci de Cinamom in kratera; fusi buli-aqa supra id; po-co, tegu tu kefa ko sika-te e inspira u termo vapo. Plu hetero profito de u-ci kondimenta es; id auxi pe relaxa e sti mei anxio; id sto algo; e auxi sti mei tro alti hema-presura.

In kuko, uti cinamom ko frukti; supra-toto ko ge-vapo pomi alo armeniaka (apricot). Alo face boni gusta e termo bibe-ma per mixa id ko meli, oranga-suku e termo-aqa.

Fenikula (Eng. Fennel) Plu sperma de u-ci fito habe u gusta simi glukoriza (liquorice). Auxi ko plu algo in gastri e plu pato de un hepa.

Kardomoni (Eng. Cardamom) Es membra de zingiber famili. Plu sperma de kardomoni habe u termo aroma gusto; pe uti mu in ambi sukro e sali fago-ma; e in plu farmako-ma.

Mu es boni te repara plu pepsia pato; supra-toto te sti mei u kumula de plu gasi in gastri. Pe mastika plu sperma te sti ma fragra u spira.

Uti ge-pulpa kardomoni sperma-va in plu oriza fago-ma; exempla ko sukro, lakti e oriza; alo in oriza Pilaf.

Karum (Eng. Caraway) Karum fito veni ex membra de iso famili de Petroseli (parsley) e Daukus (carrot). Plu sperma tena karvo un aroma oleo. Karum es boni pro pepsi sistema.

Kummel es u klari leuko alkoholi; id es ge-face ex grana e ex plu sperma de karum. Id es u fo ge-amo bibe-ma in boreo Europa; pe bibe id po vora mega pluto alo bari sito. U-ci bibe-ma proto pa gene face in Nederlanda.

Tu pote mixa plu karum sperma ad in ge-kuko potato; e plus-co uti mu in plu sukro-sito; exempla: plu biskokta, plu plaka e pani.

Korianda (Eng. coriander) Pe uti u-ci pro ambi fito vora-ma e gusta-ma. Plu sperma habe u gentili sukro gusta; kon indika de u frukti gusta. Mu gene uti in ambi sukro e sali sito.

Korianda es boni terapi te auxi u pepsia sistema; plus-co id auxi ko bakteria e fungu pato.

Uti pusi qantita de Korianda ko karni alo tomato formula (Eng. recipe). Uti u mixa de ge-pulpa sperma e oleo de oliva ko piski alo galena pre kuko id.

Kurkuma (Eng. Turmeric) Es u ge-sika radi de u fito; qi es membra de u Zingiber famili. Id es u duce mero-ma de India kuri.

Kurkuma es boni pro anto speci hepa-pato. E nu-di recerka monstra; id habe anti-inflama profito iso boni de plu-la benefici de u farmako kortisome. Id es un anti-bakteria farmako e u dinamo anti-oxida-ma. Akorda a recerka in Universita de Kalifornia, USA, id pote sti lento u progresi de Alzheimer-pato; posi u-ci explika u kausa; ne tanto poli palaeo-pe in India sufere ex u-ci pato de plu paleo-pe in Ocide.

Miristika (Eng. Nutmeg) Miristika gene face ex plu sperma de u dendro Myristika fragrans. Id auxi sti u volu de vora e es boni pro pepsi. Id ne es boni de vora mega qantita de id kausa id habe plu seqe de halucina; anti-co, in plu pusi qantita id auxi relaxa e stimula somni.

Uti id in plu formula qi tena kasea; alo in plu sukro-ma ko frukti alo oriza.

Safro (Eng. Saffron) Veni ex u ge-sika stigma de u flori Krokus sativus. Id es u mega-preci kondimenta. Id uti 1,500 flori te dona 1 gram de safro. Anti-co, pe nece uti solo oligo filamenta de id te dona sati gusta e kroma a sito.

Safro auxi sti mei u menstra algo de plu gina; plus-co, id habe afrodisia efekti. Pre poli anua plu civi in India, Helas e Roma pa uti id. E plu medieval botani-pe pa dice; id sti ma tako u spiritu e u kardia.

Uti fo pusi mero safro in plu formula de kuri (curry); de plu supa e ko plu formula ko vegeta e oriza.

Sizigi (Eng. clove) Plu sizigi es plu ge-sika blasto de plu flori ex u tropika dendro Syzygium aromaticum. Un Englanga-lingua lexi clove veni ex Latino clavus semane aku (Eng. nail). U longi ge-sika blasto feno fo simi un aku.

Sizigi habe u forti e u sti termo gusta; e id es boni tem frigi klima. Id auxi sto un denti-algo. Frika oligo guta de oleo de sizigi peri denti e gingiva; e u-ci sto un este de algo. Sizigi es boni terapi anti nausea e anti-bakteria; e id auxi ko flu de hema in soma.

U bibe-ma de meli, citru, sizigi e termo aqa habe fo boni gusta e plu boni sani profito. In kuko uti id ko plu frukti.

Zingiber (Eng. Ginger) U-ci kondimenta pa gene uti iso farmako in Cina ex centa anua six. Id auxi ko viagia-nausea e gesti-nausea; id auxi sti vigi un holo soma sistema e auxi u flu de hema in soma. Id auxi sti mei kefa-algo. Plus-co, id es boni pro inflama e un algo de artritis.

Id dona fo boni gusta e sti termo plu vegeta e karni formula. Plus-co, id es boni ge-kuko in plu plaka e biskokta; supra-toto si mu tena cokolata. Te face zingiber tea; fria pusi mero zingiber radi ad in tea-va. Po circa penta minuta fusi ad in tasa; e mixa ko pusi mero citru-suku e meli.

- pagina 7: -

Sporta ko Glosa

Oligo Glosa-pe pa petitio de qantita de karta e valu de plu litera te sporta Glosa skrable (scrabble). Pro Glosa versio pe habe 80 karta.

Si 2 persona sporta dona 12 karta a singu sporta-pe.

Pro 3 alo 4 persona dona 10 karta a singu sporta-pe.

U-ci carta monstra qanto karta de singu litera; e in kolumni tri; monstra u valu de singu litera.

Lexi-Skala

Lexi-skala es amusa; plus-co, id auxi memo e te sti ma-lati tu ski de plu Glosa lexi.

Id es pro bi alo ma sporta-pe. U buta es; de tekto u ‘skala’ de plu lexi. Singu lexi es mo litera ma longi de u pre-lexi. Singu sporta-pe habe stilo e papira.

Mo persona elekti u litera. Panto sporta-pe habe u certa tem limita (exempla 5 minuta); te grafo plu lexi; qi proto per u-la litera. Mu proto per grafo bi-litera lexi, tri-litera lexi etc. U skala ne debi habe ali space.

U vikto-pe es u-la persona qi tekto u maxi alti skala.

Infra es un exempla proto ko litera T.

   T
   T U
   T E M
   T A C I
   T A B L A
   T U N E L I
   T R I B U N A
   T E M P E S T U
   T E K N O L O G I
   T R A N S V E R S A
   T E R M O D I N A M O
   T R I G O N O M E T R I

Komo pusi es kali?

In Septembra 2003 u di 30 anua po publikatio de u munda famo bibli ex E.F. (‘Fritz’) Schumacher “Pusi es Kali”;pe pa organisa un internatio unio in London. E bi merito-pe de Right Livelihood Award Foundation pa ofere bi hetero visio in reakti a u no-certa qestio; qi pa es u nima de u-la unio; “Qe pusi es kali?”

Dice-pe mo, pa es Tewolde Berhan Gebre Egziabher (RLA 2000). An es Direktora Generali de Etiopia Ambienta Alexi Agentia. An pa dice de ‘U reali volu de plu pove agri-pe’. An auto ne es agri-pe; anti-co, Tewolde pa explika; an pa veni ex famili de pusi agri-pe; e kausa an es skience-pe an pa ergo mega ko plu pusi agri-pe komunita.

In Austro nu-du – simi in Boreo, plus, pre un Industri Revolutio – plu inventi veni ex kolekti de detekti ex plu membra de u komunita. “U-ci stimula plu libe sistema de skience e teknologi; qi existe pro ali-pe te uti; sed ne te es u proprio-pe de id.” Anti-co, un individual ge-sti kultura u ge-industri Boreo nu akti iso u domina globa kultura.

Fo hetero de cent-anua 19, tem Europa pa kumula pluto ex plu koloni; id es plu pluto landa qi nu-di sio lose ma ex kaos e ex plu milita. U-ci krea un okasio pro muta. Uti u-ci okasio, un Austro debi lukta te gene ma libe; pro sti ma eqa okasio pro panto-pe; e pro ma re-forma de plu globa instituti. Si plu-la duce-pe pa volu u justi munda; il es tri duce-ra mu debi akti:

Mo: rekogni; un Austro es mega e heterogene.

Bi: rekogni; panto voci nece gene audi; te face u speci de globa logi; qi panto-pe pote akti mero.

Tri: habe u nece de respekti panto-ci speci; per muta internatio lega e instituti; te ofere plu-la volu de ambi plu maxi debili e plu maxi dinamo. Kon tri-ci konditio; an pa dice; “mi kredi u procesi de globa logi fu sio profito singu-pe; e fini id fu gene globa ko-opera.

Ex hetero vista Pat Mooney (RLA 1985), exekutivi direktora de ETC Grega, Kanada; pa indika; plu pusi-ra pote es perilo – supra-toto u menaci de nanoteknologi. Pro plu pove-pe de Munda Tri plu seqe de nanoteknologi sio es fo mega. Mu plu representi-pe probabli sio negotia topo WTO (Munda Komercia Organisatio) konference in Mexiko minus holo logi u longi tem impakti de u-ci teknologi ko mu plu ge-face-ra e plu merkato. Plu mero de munda ekonomi sio gene transforma kausa; per habe u pote de tekto plu material e produkti ex atomi metri-ru; plu komercia ne es ge-limita a norma face-ma e merka-lo.

Subito tu ne dura nece gene tu kupra ex Peru alo kobalt ex Zambia; alo stana ex Malaisia. Posi tu pote gene plu iso qalita per face plu neo mixa. Qi signifi; si tu tend proto u kupra mina; po negotia tu plu komerci akorda; e proto produce; posi il ne dura es u nece pro tu speci kupra.

Panto na habe u teknologi unda veni a na. Id es u maxi mega teknologi unda; u munda a nu pa vide. E id gene duce per plu maxi mega komercia de u munda. Na nece habe un internatio konveni te metri u valu de plu neo teknologi; un internatio lega struktura te analisi mu e te tena na ante

.”Ex “Cornerstones” publikatio de The Right Livelihood Award Foundation. www.rightlivelihood.org

- pagina 8: -

Enigma Pagina: place vide www.glosa.org/pic/pgn088_enigm.png

www.glosa.org, 2005-06-26 ... 2008-02-26.